Kohlmeisens – ein Gedicht auf Schwäbisch

Dr Kohlmeis ond sei Kohlmeisin
dia sitzed ema Büschle drinn
ganz eng beinand, so richtig bhäb,

als obs für sia nix schöners gäb.
Auf oimol fliagt sia schnell drvoh,
er pfeift ihr nach mit hellem To,
doch macht se sich wohl garnix drauß,
sia fliagt zum Firscht vom Nochberhaus,
hopft hin ond her als wart se drauf
daß er au komm zu ihra nauf.
Er tschilpt ond pfeift, macht sich an Pla
wia er sia drzua brenga kah,
den Nischtkaschta zu inschpiziera,
vielleicht läßt se sich no verführa,
legt ihre Oier oins, zwoi, drei,
ens Neschtle en dem Kaschta nei.
Dia Kohlmeisin, also sei Braut,
sia hot ihn jo scho lang durchschaut,

hot gega sNescht nix eizuwenda
bloß duat sems net auf dNas naufbenda,
sia läßt ihn no a zeitlang werba,
den Schpass läßt se sich net verderba.

Doch merkt se, sei Interesse schwendet,

er sich bald zuara Andera wendet,
dann läßt sen ganz dicht an sich schlupfa
ihr Federa von ihm leicht durchzupfa,
sia schnäbled boide frisch drauflos
ond scho pressierts, sia holed Moos,
des traged se en Kaschta nei,
daß sNescht so richtig woich wird sei.

Äll Tag legt sia a Ei ens Nescht
beim Achta piepst se: “Descht dr Rescht“
sia fangt sofort mit brüata ah,
er fuatert se so guat er kah.
Noch vierzeha Tag, ja jetzt gohts rond,
älle send gschlupft, ond älle gsond.
Ab sofort gibt’s koi Schnäbla meh
bloß Futter suacha, jemmineh,
was dia acht Jonge nonterdrucka
an Raupa, Würmle oder Mucka,
des muaß erscht zammatraga sei,
doch schaffa deand ses, onsre Zwei.
Wenn no dia Jonge flügge send
dia Alte scho verlassa hend,
gohts Ende Juni wieder los,
wia war des noch? Wia war des bloß?

Dr Kohlmeis ond sei Kohlmeisin
dia sitzed ema Büschle drinn
ganz eng beinand, so richtig bhäb,
als obs für sie nix schöners gäb.

Autor: Bernhard Kaufmann
schwaekau@web.de
http://www.schwaebischgschwaetzt.de